Færsluflokkur: Stjórnmál og samfélag

Illa skrifuð frétt

Þetta er ákaflega illa skrifuð og ruglingsleg frétt. Ég held að Gunnar Helgi hafi ekki sagt það sem eftir honum er haft - það er gjörsamlega óskiljanlegt. Ég held að annað hvort hafi blaðamaðurinn verið að flýta sér ákaflega mikið og ekki lesið fréttina yfir eða hann hefur ekki skilið almennilega það sem Gunnar Helgi sagði. Takið þetta út, krakkar, og vandið ykkur betur.
mbl.is „Hér er þingræði“
Tilkynna um óviðeigandi tengingu við frétt

Fólk er ekki fífl, Bjarni!

Ágætu bloggvinir.

Eftirfarandi grein skrifaði ég í fyrrinótt og sendi hana rakleitt í Morgunblaði og Fréttablaðið. Nú bíð ég spenntur eftir því hvort hún verður birtí Mbl. - efast ekki um hitt!

En til þess að hún komi fyrir einhverra augu set ég hana hér líka. Manni ofbýður oft málflutningur sjálfstæðismanna þessa dagana. Þeir hafa ekkert lært og viðurkenna ekkert. Ekkert er þeim að kenna! Hún var annars góð grein JBH í blaðinu í dag! 

Álítur formaður Sjálfstæðisflokksins að fólk sé fífl? Svo gæti maður haldið, af skrifum hans í 80 ára afmælisbók flokksins að dæma. Þar varar hann við vaxandi ríkisafskiptum núverandi ríkisstjórnar og svo er að skilja sem landflótti nú um stundir sé af þeim orsökum.

Í vefritinu Pressunni er sagt frá skrifum þessarar mannvitsbrekku: „Hann telur að Sjálfstæðisflokkurinn og ungliðar hans gegni lykilhlutverki við þá endurbyggingu sem framundan er eftir bankahrunið. Ríkisstjórnin sé á góðri leið með að rústa áralangri baráttu Sjálfstæðisflokksins fyrir minnkandi ríkisafskiptum og meira frelsi einstaklinga og frelsi í viðskiptum. Samhliða hafi lífskjör í landinu batnað verulega.
„Sú vinstristjórn sem nú er við völd telur að allar lausnir á þeim vandamálum sem að okkur steðja megi leysa með auknum ríkisafskiptum á öllum sviðum. Aðgerðir hennar og árorm (svo!) bera öll þess merki og nái þær fram að gagna (svo!) er ljóst að hagsmunum þjóðarinnar er stefnt í hættu.""

Manni fallast hendur. Ætlast formaður Sjálfstæðisflokksins til þess að einhverjir aðrir en SUS-arar, frjálshyggjumenn og aðrir dyggir áhangendur Sjálfstæðisflokksins trúi því að það sem við þurfum nú séu meira frelsi í viðskiptum?

Ég fullyrði að meirihluti þjóðarinnar hafi einmitt fengið nóg af öllu því. Og meirihluti þjóðarinnar veit að það voru „frjálsir einstaklingar og viðskiptamenni" sem rúðu almenning inn að skyrtunni og fengu hann sviptan ærunni. Það hafðist upp úr því að veita þeim fullt frelsi til athafna. Þetta „frelsi" sjálfstæðismanna er nefnilega frelsi hinna fáu til að græða á hinum mörgu. Það hefur sannast núna.

Ég vonaði að eftir hrunið myndu stjórnmálamenn leggja stundarhagsmunina til hliðar meðan verið væri að taka til eftir öll ósköpin sem yfir dundu. En, nei. Stjórnarandstöðuflokkarnir hafa þvælst fyrir og þæft málin í nafni lýðræðis en hin raunverulega ástæða var harðvítug valdabarátta.

Og nú hefur sú valdabarátta tekið á sig þá mynd að núverandi ríkisstjórn, sem er að reyna að koma af stað endurreisn efnahagslífsins, er sögð eiga sök á ósköpunum en „hugsjónir" fyrri ríkissstjórnar, sem urðu að lokum orsök hrunsins, séu vænlegastar til endurreisnarinnar.

80 ár eru alveg nógu langur tími, nú mætti fara að leggja Sjálfstæðisflokkinn niður.


Skammarleg vinnubrögð Agnesar

Þetta viðtal Agnesar Bragdóttur er til mikillar skammar fyrir Morgunblaðið. Eins og Guðmundur Magnússon skrifaði í bloggi sínu fyrr í dag er þetta það sem Jónas Kristjánsson hefur kallað "kranablaðamennsku". Davíð Oddsson fær að bera á borð sína venjulegu þvælu um að hann hafi varað menn við, án þess að tilraun sé gerð til að spyrja hann nánar út í hæpnar fullyrðingar eða reyna að tengja það sem hann segir þarna við aðrar upplýsingar í þessu máli.

Ég hef komist að þeirri niðurstöðu  að ekkert annað sé á bak við þá gjörð Morgunblaðsins að birta þetta viðtal núna en að koma sök á bankaklúðrinu á þá sem eru þó að reyna að bjarga því sem bjargað verður, ríkisstjórn Íslands. Agnes Bragadóttir lætur nota sig í stórpólitískum hráskinnaleik Sjálfstæðisflokksins til þess að reyna að bæta stöðu flokksins fyrir næstu kosningar, sem leynt og ljóst er stefnt á að verði með haustinu ef ríkisábyrgðin vegna Icesafe verður felld.

Ef Agnesi var ekki att á foraðið heldur gerði þetta af fúsum og frjálsum vilja er þetta viðtal henni til stórkostlegrar minnkunar og færir Morgunblaðið á ný niður á plan flokksblaðamennsku.

Af þessum sökum hef ég ákveðið að segja upp áskrift minni að Morgunblaðinu, sem ég hef lesið reglulega í þau 40 ár sem liðin eru frá því ég hóf sjálfur störf við blaðamennsku. Mér er nóg boðið.


mbl.is Ekki setja þjóðina á hausinn
Tilkynna um óviðeigandi tengingu við frétt

Ályktun stjórnar Hollvina RÚV 17. apríl 2009

Þessa ályktun Hollvina RÚV sendi ég til fjölmiðla síðdegis og stenst ekki mátið að gefa blogg- og fésbókarvinum mínum smá forskot - ég veit raunar ekkert um það hvort fjölmiðlar birta þetta eða segja frá því. En ég er náttúrlega óhemjuánægður með að nú viðurkennir meira að segja leiðarahöfundur Moggans  að allt það sem við í stjórn Hollvina höfum haldið fram núna í nokkur ár um hlutafélagavæðingu RÚV var aldeilis rétt. Nú er bara að reyna að bjarga fjárhag Ríkisútvarpsins, gera það aftur að ríkisstofnun og efla það góða fólk sem þar starfar til mikilla afreka á næstu árum.

 

Stjórn Hollvina Ríkisútvarpsins fagnar því að loksins hafa augu fólks lokist upp fyrir því að breyting RÚV í opinbert hlutafélag var til einskis.

Fullyrt var þegar sett voru ný lög um Ríkisútvarpið 2007 og það gert að „opinberu hlutafélagi", að það hefði í för með sér að hallarekstur yrði liðin tíð. Nú hefur verið upplýst að skammtímaskuldir Ríkisútvarpsins námu 562 milljónum króna um síðustu áramót en í apríl 2007 hafi félagið átt 879 milljónir.

Stjórn Hollvina varaði ítrekað við því á meðan fyrrnefnd lagasetning var undirbúin, bæði í athugasemdum við lagafrumvörpin og í blaðagreinum, að breyting RÚV í hlutafélag myndi engu breyta um þá alvarlegu fjárhagsstöðu sem stofnunin var þá í.

Nú hefur menntamálaráðherra ákveðið að koma Ríkisútvarpinu til hjálpar með því að breyta skuld þess í hlutafé að því tilskyldu að það verði samþykkt á hluthafafundi.

Stjórn Hollvina RÚV treystir sér ekki til að meta þá gjörð en tekur undir með leiðarahöfundi Morgunblaðsins sl. fimmtudag að fróðlegt gæti verið að fylgjast með umræðum á þeim fundi „og heyra hvort eini hluthafinn mótmæli þessari skerðingu og útvötnun á hlut sínum".

Stjórn Hollvina RÚV tekur einnig undir með leiðarahöfundi Morgunblaðsins þegar hann skrifar: „Sú staðreynd að enn skuli þurfa að koma Ríkisútvarpinu ohf. til bjargar ber því vitni að sá gjörningur, sem framinn var með stofnun þess 1. apríl 2007, hefur ekki skilað tilætluðum árangri."

Stjórn Hollvina RÚV tekur ennfremur undir þá skoðun leiðarahöfundar að Ríkisútvarpið hafi mikilvægum skyldum að gegna og geri það að mörgu leyti svo sómi sé að. En ekkert virðist hafa breyst í rekstri stofnunarinnar þrátt fyrir breytt rekstrarform, rétt eins og stjórn Hollvina RÚV benti á hvað eftir annað að yrði raunin.

 

Fyrir hönd stjórnar

Hollvina Ríkisútvarpsins,

Þorgrímur Gestsson formaður


Lögreglan í þjónustu verktaka

Það var löngu ljóst að eigandi húsanna á þessum reit stefndi leynt og ljóst að því að verðfella húsin, m.a. með því að leigja eitt þeirra fíklum, sem verulegt ónæði var að. Nágrannarnir gáfu sig hver eftir annan og seldu til að sleppa. Endahnykkurinn var að lögreglan tók að sér að hefja niðurrif hússins eftir að hafa rutt hústökufólkinu út með einstaklega óhugnanlegum aðferðum. Er lögreglan gengin i þjónustu verktaka? Getur maður hér eftir hringt í lögregluna ef maður þarf að rífa hús?

 Unga hústökufólkið hefur hótað að taka fleiri hús á næstunni. Ég styð það fullkomlega þótt það hafi í för með sér hættu á að lögreglan haldi áfram skemmdarverkum á gömlum húsum.

Þetta lögregluofbeldi sem þarna fór fram hefur vonandi þegar verið kært. Viðkomandi lögreglumenn og yfirmenn þeirra þurfa að sanda fyrir máli sínu.


mbl.is Miðborg í sárum góðæris
Tilkynna um óviðeigandi tengingu við frétt

Lifa enn í klíkuheimum

Enn hafa sjálfstæðismenn ekkert lært. Flokkurinn hrynur niður allt í kringum þá en þeir halda áfram að tuða og nudda og naga, sárir og fúlir yfir að vera búnir að tapa völdunum, sem þeir geta ekki skilið með nokkru móti að geti verið í höndum annarra en þeirra sjálfra, þeir séu bornir til valda á landi hér. Svipað er að gerast í Grindavík, þar halda menn áfram í sömu klíku- fyrirgreiðslupólitíkinni. Fyrst framsóknarmaðurinn var ekki metinn hæfastur af umsækjendum og átti ekki að fá stöðuna sprengja þeir bæjarstjórnina - aftur! Viljum við þetta stjórnarfar áfram? Skilur  þetta fólk ekki hvers vegna uppreisn var gerð á Íslandi?
mbl.is Stefnir í næturfund
Tilkynna um óviðeigandi tengingu við frétt

Húmorsleysi!?

Hvílíkt húmorsleysi! Taldi einhver virkilega að Morgunblaðið væri að líkja Geir við hund með því að slengja þessu saman? Finnst mönnum að verið sé að vanvirða Geir með því að segja frá því að hann er hættur á þingi í sömu andránni og skýrt var frá því að blindrahundur er kominn í þjónustu alþingimanns? Ja, annað hvort húmorsleysi eða þá að fylgjendur Geirs treysti því ekki að mannorð hans komi vel út úr samfylgd með hundinum!
mbl.is Afsökunarbeiðni
Tilkynna um óviðeigandi tengingu við frétt

Stefna Sjálfstæðisflokksins svínvirkaði

Þessi grein birtist í síðasta Fjarðarpósti en Guðni ritstjóri birti ranga útgáfu - ég sá hnökra á greininni, bætti úr og bað ritstj. skipta, sem hann lofaði en hefur gleymt. Hér kemur rétt útgáfa:

 

Þorgerður Katrín Gunnarsdóttir skrifar í síðasta tölublað Fjarðarpóstsins að í vor verði kosið um hvort hér „verði áfram byggt upp öflugt þjóðfélag velmegunar eða hvort að við festumst í kreddum miðstýringar og ríkisforsjár til frambúðar."

Þarna er ýmsu snúið á hvolf. Forystumenn í Sjálfstæðisflokknum hafa gumað af því að hafa létt flestum hömlum af fjármálalífi þjóðarinnar, í nafni „frjáls framtaks einstaklingsins" Nú er komið í ljós að sú stefna Sjálfstæðisflokksins að tryggja „frjálst framtak einstaklingsins" brást alls ekki, hún svínvirkaði. Algjört frelsi einstaklingsins hlýtur fyrr en síðar að fara úr böndunum, eins og komið hefur í ljós á svo eftirminnilegan hátt. Séu engar hömlur hafðar ganga óvandaðir einstaklingar að sjálfsögðu eins langt og þeir geta. Þetta hefur jafnvel Alan Greenspan, fyrrverandi seðlabankastjóri Bandaríkjanna, viðurkennt.

Þorgerður Katrín getur býsnast eins og hún vill yfir því að núverandi stjórnvöld séu ekki að gera neitt, nema ef til vill það sem hennar ríkisstjórn hefði gert hvort sem var. En það er hlægileg fullyrðing og barnaleg. Hvað ætlaði sú ríkisstjórn að gera? Fátt heyrðist af því meðan hún lafði, og neitaði fram í rauðan dauðann að nokkur á hennar vegum bæri nokkra einustu ábyrgð. Og nú hefur nefnd innan Flokksins komist að þeirri niðurstöðu að stefnu Sjálfstæðisflokksins sé ekki um hrunið að kenna heldur beri einhverjir ótilgreindir menn úti í bæ alla sökina!

Svo held ég að Þorgerður Katrín Gunnarsdóttir ætti að tala sem minnst um efla það velferðarkerfi, sem var komið á hér á landi þrátt fyrir Sjálfstæðisflokkinn, en hann hefur samt sem áður löngum eignað sér, en hefur á síðustu árumgrafið verulega undan því.

Ég tek undir það að við eigum að leggja áherslu á „svigrúm til frumkvæðis og verðmætasköpunar svo íslenskt atvinnulíf muni blómstra á nýjan leik". En í öllum bænum ekki sams konar frumkvæði og sams konar „verðmætasköpun" og ríkisstjórn Davíðs Oddssonar lagði grunninn að.


Enron/Baugur Group?

Það var stórmerkilegt að horfa á myndina um hrun Enron-blekkingarinnar, sem var verið að sýna í sjónvarpinu, engu líkara en hinir íslensku "útrásarvíkingar" hafi farið í læri hjá þessum snillingum! Það er eitt allsherjar samræmi í þessu: Feluleikurinn með peningana, enginn veit hvaðan gróðinn kemur né hvert hann fer enda þótt margir hafi virst sjá að fyrirtækið tapaði á öllu sem það tók sér fyrir hendur. Og það var stórfróðlegt að heyra hvernig "hin frjálsu markaðsöfl" spiluðu á orkuverðið og höfðu Kaliforníu að féþúfu. Ekki síður að heyra af pappírstæturunum, sem ég hafði raunar heyrt minnst á áður - hvað skyldu hafa farið í gegnum hina íslensku pappírstætara? Í USA brást allt eftirlit eins og hér, fólk góndi bara bláum, sakleysislegum augum í aðdáun á það hvernig "snillingarnir" græddu á tá og fingri. Rétt eins og hér. Og enn eigum við vísast eftir að heyra sama sönginn: Allt þarf að vera frjálst, sem allra fæstar reglur eiga að gilda, helst engar. Já, þá fá glæpamennirnir frjálsar hendur. Tóku menn eftir því hvað menn segja núna þar vestra? Jú: Þetta getur gerst aftur, þetta er ekkert einsdæmi. "Snillingarnir" okkar eiga líka eftir að byrja aftur - nema hart verði látið mæta hörðu.

Ég er þó ekki talsmaður þess að þeir verði járnaðir, en leiddir með föstum og ákveðnum tökum til yfirheyrslu - sem fyrst.


mbl.is IMF varaði við í apríl
Tilkynna um óviðeigandi tengingu við frétt

Enn ein afneitun á augljósum staðreyndum - eða villtist ég inn á vef Baggalúts?

Ég verð að viðurkenna að ég er enn svolítið dasaður eftir fréttir af skýrslu endurreisnarnefndar Sjálfstæðisflokksins. Í fyrsta lagi: Allt sem þessir ágætu (karl)menn nefna sem orsök hrunsins er rétt. En ansi stór hluti þjóðarinnar hefur hinsvegar áttað sig á þessu fyrir löngu. Allt þetta var kjarninn í mótmælum okkar Austurvellinga.

Hins vegar er erfitt að átta sig á því hvað þeir eru að fara þegar þeir halda því fram að ekkert af þessu sé sjálfum Sjálfstæðisflokknum eða stefnu hans að kenna. Bíðið nú aldeilis við: Frelsi í atvinnulífinu, einkavæðing, frjálst framtak einstaklingsins. Var þetta ekki þarna allt saman? Voru það þá bara einstaklingar sem fylgdu helstu stefnumálum flokksins sem brugðust, þeir í sjálfu sér, "per se" eins og menn segja þegar þeir vilja virðast gáfaðir. Semsagt vondir sjálfstæðismenn, vondir kapítalistar.

Nöfnin sem standa undir skýrslunni eru líka athyglisverð. Ég staðnæmist þó aðallega við nafnið Ólafur Klemensson - er það ekki maðurinn með vindilinn sem gekk milli mótmælenda við Hótel Borg, hrinti konum, ógnaði körlum og kallaði fólk kommatitti eða eitthvað álíka? Fólk átti víst bara að sitja heima og bíða eftir að hann og félagar hans lykju við endurreisnarskýrslu Sjálfstæðisflokksins, sem er náttúrlega ætlað að  hreinsa skjöld Flokksins svo hann fái nú mikið fylgi í næstu kosningum! Og allir gleymi nú þessum ávirðingum - en annars: Þarna eru engin nöfn nefnd, þó tekið fram að ekki hafi verið heppilegt að fyrrum valdamenn sætu í stjórn Seðlabankans. Því er ekki nafnið nefnt?

Sjónvarpið var ekki með þessa frétt - eða fór hún bara framhjá mér? Eitt augnablik hélt ég að þetta væri bara gróft grín en svo fann ég heimasíðu Endurreisnarnefndar og sýndist þetta vera fúlasta alvara. Eða lenti ég óvart inn á vef Baggalúts?

 


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband