Já, með dyggri aðstoð settirðu okkur á hausinn, Jón

Nei, Jón Ásgeir, þú settir Ísland ekki á hausinn einn þíns liðs. Þið lögðust nokkrir á eitt. Í hvers þágu fóruð þið í þessa svonefndu "útrás"? Í þágu þjóðarinnar? Nei, í ykkar eigin þágu. Það hefði verið í lagi ef þið hefðuð sést fyrir og vitað hve langt þið ættuð að ganga. En þið hélduð áfram og áfram og áfram þangað til allt hrundi. Ég hef heyrt það nefnt "eftiráspeki" þegar menn segja að ekki hafi verið tekið mark á viðvörunarljósum sem blikkuðu allt síðastliðið ár. En Hallgrímur Thorsteinsson rifjaði upp ýmislegt sem var í fréttum um það fyrri hluta ársins í þætti sínum Vikulokunum á laugardaginn. Það var fróðleg samantekt og góð upprifjun fyrir alla. Hagfræðingar og bankamenn í útlöndum voru furðu lostnir á því sem var að gerast í ofvöxnu bankakerfinu hér en ráðamenn ypptu öxlum - hafa menn gleymt þeim ummælum varaformanns Sjálfstæðisflokksins að á bak við þetta hlytu að liggja annarlegar ástæður?

Já, Jón Ásgeir Jóhannesson, þú lagðir þig allan fram um að koma Íslandi á hausinn. Og nú átt þú að nýta alla þína "harðdrægni í viðskiptum" til þess að vinna í þágu þjóðarinnar - ekki í þína þágu - við að greiða upp í þá skuld sem nú er verið að leggja á herðar okkar. Það eiga allir hinir "útrásarvíkingarnir" að gera líka. Ganga fram niðurlútir, biðjast afsökunar á mistökum sínum og leggja fram allt það fé sem þeir geta tekið úr fyrirtækjum sínum erlendis og bankahólfum í skattaparadísum. Þá má vera að þeim verði fyrirgefið. Því það er stórmannlegt að fyrirgefa mönnum misgjörðir þeirra - ef þeir iðrast sjálfir.

Jón Ásgeir tekur dóma nærri sér

Athugasemdir

[SigG (IP-tala skráð) 29.12.2008 kl. 09:59]

Þessi grein í MBL er grátleg, Jón Ásgeir kann ekki að skammast sín, hann lætur eins og hann hafi gert okkur þjóðinni einhvern greiða. Við munum á endanum þurfa að borga fyrir allt hans sukk með sköttum.

[Heidi Strand, 29.12.2008 kl. 14:27]