Allt á borðið um ES-aðild, kosti OG galla

Sem ég sit hér aðfaranótt fyrsta almenna vinnudags ársins 2009 velti ég fyrir mér hvað muni eiginlega gerast á þessu ári. Miðað við þá stefnu sem umræðan hefur tekið undanfarna daga held ég að ætlunin sé að reka okkur mjög hratt út í það að taka einhvers konar ákvörðun um Evrópusambandsaðild. Þá held ég að við verðum að passa okkur mjög vel því annars vegar höfum við Evrópusinna, sem sjá ekkert annað en aðild og hins vegar þá sem sjá ekkert annað en illt við aðild. Ég hef verið í báðum hópunum; lengst af hef ég verið mikill andstæðingur aðildar en haust snerist ég skyndilega og reifst jafnvel við mína nánustu, spurði til að mynda hvort aðildarríkin hefðu öll misst fullveldi sitt - hvort Frakkar, Þjóðverjar og allar þessar þjóðir væru ósjálfstæðar og hvort ekki væri réttara að vinna með öðrum Evrópuríkjum en einangra okkur hér úti í hafi.

En ég er alls ekki viss, aðallega vegna þess að ég veit of lítið um þetta. Þess vegna er aðalatriðið að ítarleg og upplýsandi umræða hefjist sem fyrst og allt verði lagt á borðið, bæði kostir OG gallar. Hvað með fiskinn? Hvað með aðrar auðlindir? Er hætta á að við missum að einhverju leyti yfirráðarétt yfir þessu? Fyllast Íslandsmið af fiskiskiðum frá Spáni, Portúgal, Bretlandi? Verður ástandið eins og áður farið var að stækka fiskveiðilögsöguna?

Allt þetta verðum við að fá að vita, og ekki kostina frá Samfylkingunni og gallana frá Sjálfstæðisflokknum eða LÍÚ heldur verða fjölmiðlar heldur betur að fara að hysja upp um sig brækurnar og útvega okkur upplýsingar og umfram allt spyrja stjórnmálamenn og embættismenn hvassra spurninga, láta þá ekki sleppa endalaust með óljóst hjal, múður og undanslátt.

Allt á borðið og fulla hreinskilni, takk.

Og ef ég á að meta afstöðu vinstri flokkanna  sýnist mér Samfylkingin vera staða í sínum rétttrúnaði en að Vinstri græn séu tilbúin að ræða málið - og þá væntanlega á krítískan hátt. Það tel ég vænlegra en hallelújahjal Samfylkingarmanna til þessa.

Athugasemdir

[Haraldur Bjarnason, 2.1.2009 kl. 09:35]

Þetta er einfaldlega það sem okkur vantar. Það þarf að fara strax í viðræður við ESB og út frá þeim þurfum við að meta hvort þetta er fýsilegur kostur eða ekki. LÍÚ forkólfar hafa að undanförnu farið mikinn og talið upp ókosti. Allt er þetta hins vegar byggt á getgátum meðan við ræðum ekki við pólitíkusa ESB. Embættismennirnir hafa ekkert fram að færa. Þetta er og verður alltaf pólitísk ákvörðun af beggja hálfu. Við þurfum ekki þjóðaratkvæðagreiðslu um hvort við eigum að ræða við ESB. Þjóðartkvæðagreiðslan kemur þegar það liggur fyrir hvað við fáum og hverju við þurfum að fórna. Ef við þurfum að fórna forræði yfir fiskimiðunum (sem að visu er á fárra höndum núna) þá getum við gleymt þessu. Sama með aðrar auðlindir, eins og orkuna og landbúnaðinn.

[Þorgrímur Gestsson, 2.1.2009 kl. 10:04]

Sammála, Halli. En við hljótum að geta fengið að vita um kostina og gallana í aðalatriðum áður en beinar viðræður hefjast þótt ákveðin atriði verði ekki ljós fyrr en samningamenn eru farnir að makka. Svo grunar mig sterklega að gangi þetta svo langt verði reynt að hafa leynd yfir öllu en það má alls ekki verða. Allt fyrir opnum tjöldum, takk fyrir.

[Hjálmtýr V Heiðdal, 2.1.2009 kl. 17:09]

Sæll Þorgrímur - nýi bloggvinur

Ég hef verið hlynntur því að við förum í aðildarviðræður til þess að fá kostina og gallana á borðið. Þjóðin getur ekki rætt málin án ítarlegra upplýsinga. Það ríkir mikill upplýsingaskortur sem gefur bullukollum svigrúm. Umræðuhefð okkar Íslendinga er dálítið lík skotgrafahernaði eins og þú sjálfsagt þekkir.

[Þorgrímur Gestsson, 3.1.2009 kl. 11:08]

Ég er sammála þér, nýi bloggvinur! Upplýsingar án undanráttar og gagnrýninn fréttaflutningur þar sem miskunnarlaust er spurt og ráðamenn ekki látnir komasts upp með moðreyk eins og hefur verið allt of mikið um til þessa.