Sannleikurinn um Taser?

Já, hver er sannleikurinn um þessa "rafmagnsstuðbyssu" sem íslenskir lögreglumenn vilja koma höndum yfir til þess að - ja, til hvers? Verja sig eða yfirbuga brjálaða menn? Með slíku vopni væri lögregla á okkar friðsælu eyju ekki lengur vopnlaus. Viljum við vopnaða lögreglu?

Á friðsælum hvítasunnudegi þegar austanáttin er furðu sterk hér í Hafnarfirði og maður þakkar sínum sæla fyrir að vera ekki einhvers staðar úti á þjóðvegi blasir við furðulegt skrif lögreglumanns í sunnudagsmogga, bls. 41. Fyrirsögnin er: Sannleikurinn um Taser valdbeitingartækið og niðurstaða þeirrar ungu löggu sem þarna hefur slegið á lyklaborð er að líklega séu "þeir sem hafa yfirgnæft umræðuna um Taser valdbeitingartækið séu akkúrat þeir sem eru stundum í þeim aðstæðum að tækið yrði jafnvel notað gegn þeim."

Já, akkúrat það!!!

Þetta eru skrítin rök. En enn skrítnara er að löggumaðurinn gerir málflutning Amnesty International í þessum efni tortryggilegan en tekur niðurstöður "hlutlausra rannsókna" á vegum framleiðandans sem heilagan sannleika. En sannleikurinn er sá að eftir atburðina við Rauðavatn treysti ég ekki lögreglunni. Það er augljóst á þeim myndskeiðum sem unnt var að skoða á netinu að lögreglan missti vald á skapsmunum sínum - það sem meira er: Varðstjóri á staðnum bað fréttamenn að bíða og sjá "verkin tala". Verkin töluðu svo sannarlega.´

 Ég "gúglaði" "taser" og komst að því að þessi vopn eru seld almenningi, m.a. á netinu og ódýrasta vopnið kostar 300$. Og það fann ég líka út að þetta fyrirtæki, Taser, hefur her lögmanna í því að kæra hvern þann réttarlækni sem dirfist að úrskurða að maður hafi látist af völdum þessa vopns. Það skal líta út fyrir að vera alveg "hættulaust", væntanlega svo það seljist betur á almennum markaði!

Mér varð satt að segja hverft við að sjá þann viðbúnað sem lögreglan hafði við Rauðavatn: Röð vígalegra, hjálmklæddra ungra manna með þessa plastskildi sem mynduðu óárennilegan vegg. Er það þetta sem menn mega eiga von á í framtíðinni? Og að auki vopnaðir rafmagnsbyssum? Lýðurinn skal ekki komast upp með neinn moðreyk framar! En nú hallar ekki á, vörubílstjórar hafa verið meðhöndlaðir eins og kínverskt heilsuræktarfólk og breskir náttúrverndarsinnar. Harkalegar náttúrlega en kannski verða skildirnir dregnir fram þegar í hart fer austur við Þjórsá, sem hlýtur að gerast hvað úr hverju.  Neið, maður hafði á tilfinningunni að þessum ungu löggum þætti einum of "gaman" að fjörinu við Rauðavatn og sannið til, þess verður ekki langt að bíða að þeir fá útrás næst!

Þá rifjast upp fréttin af því að héraðsdómur Reykjavíkur sló á fingur Útlendingastofnunar og dómsmálaráðuneytisins sem neituðu ungum Máritaníumanni um landvistarleyfi án þess, að því er virðist, að hafa haft fyrir því að rannsaka fullyrðingar hans um að hann hefði orðið fyrir misþyrmingum af hendi lögreglu í heimalandi sínu. Þetta þarf nú að kanna en vesalings maðurinn verður líklega að hírast suður í Keflavík enn um sinn, eins og hann hefur gert í fjögur ár! Þetta minnir á mál kúrdíska bóndans forðum daga sem var leynt á bæ norður í landi vegna þess að útlendingaeftirlitið vildi senda hann úr landi þótt hans biði fangelsi og ill meðferð fyrir það eitt að hann var Kúrdi. En íslensk yfirvöld höfðu einfaldlega haft samband við yfirvöld í heimalandi mannsins - mig minnir hann hafa verið frá kúrdíska hluta Tyrklands - og fengið þær upplýsingar þar að þetta væri tóm vitleysa!!! Því var trúað. En meðal annarra orða: Hver urðu örlög Kúrdans? Er hann ennþá fjósamaður fyrir norðan?

 

Athugasemdir

[Óskar Helgi Helgason (IP-tala skráð) 11.5.2008 kl. 14:51]

Heill og sæll; Þorgrímur !

Þakka þér; afar vandaða lýsingu, sem myndræna. Sannast sagna; hygg ég, að þú hafir fyllilega rétt fyrir þér, með það ástand, sem upp hefði komið, við Rauðavatn, hefðu vaktarar (lögreglumenn) haft þessar rafmagnsbyssur, í fórum sínum. Nógu ofstopafullir voru þeir samt; með piparúða sinn, m.a.

Jafnframt; eiga borgararnir heimtingu á því, að lágmarks greind, sem skynsemi, búi í þeim mönnum, hverjir til löggæzlu starfa veljist.

Með beztu kveðjum; úr Árnesþingi / Óskar Helgi Helgason, frá Gamla Hrauni og Hvítárvöllum

[Þorgrímur Gestsson, 11.5.2008 kl. 22:24]

Þakka þér fyrir athugasemdina, Óskar Helgi. Gott orð yfir löggurnar: Vaktarar! Lögreglumaður eða lögregluþjónn hefur mér alltaf fundist stirðbusalegt og eiginlega dálítið klaufalegt orð! Þeir vakta bæinn og vaka yfir velferð okkar! Náskylt þessu er hernaðarbröltið; hvers vegna í ósköpunum er verið að fá hingað fjórar herþotur nokkrum sinnum á ári til að "verja" okkur? Hver "ver" okkur þegar hér eru engar herþotur? Og gegn hverjum er verið að verja okkur? Hver hefur hagsmuni af því að ráðast á okkur? Og hvaða hagsmunir gætu það svosem orðið?

Ég sendi mínar bestu kveðjur austur í Flóa - þaðan er móðurætt móður minnar, amma mín ólst upp á Stokkseyri og hafði á takteinum ýmis orðtök úr Flóanum og tilvitnanir í einkennilegt fólk þar.

[Óskar Helgi Helgason (IP-tala skráð) 11.5.2008 kl. 23:23]

Þakka þér; sömuleiðis, Þorgrímur. Skila góðum kveðjum, til nágranna minna, í austri, þ.e., Flóamanna. Bý sjálfur, í Efra- Ölvesi (Hveragerði).

Að öðrum ólöstuðum forfeðrum- sem formæðrum þínum, hygg ég, að minning Ragnheiðar Jónsdóttur, ömmu þinnar, hver var ein hin merkasta, allra kvenna, íslenzkra; í rithöfundastétt, sé enn mjög kær, þeim eldri Stokkseyringum, sem Sunnlendingum öðrum, sem muna hana, sem hennar merku ritverk öll. 

Þá hafa foreldrar þínir, einnig, fengið hvarvetna hið bezta orð, hvar sem ég hefi heyrt þeirra getið.

Sjálfur; ólst ég upp, á Stokkseyri, árin 1961 - 1971, að Vestri- Móhúsum; og starfaði þar, löngu síðar, hjá Hraðfrystihúsi Stokkseyrar hf, 1983 - 1991.

Móðurforeldrar mínir; þau Þórður Árnason (1890 - 1933) og Ágústa Guðmundsdóttir (1888 - 1976), hverra dóttir var Jónína Aldís (1923 - 1999), móðir mín; bjuggu, að Hólmi, ofarlega, í útjaðri þorpsins. 

Með kærum kveðjum, sem fyrr / Óskar Helgi Helgason

[Ragnar S. (IP-tala skráð) 12.5.2008 kl. 12:43]

Sæll Þorgrímur

Ég hef gert aðeins meira en að gúggla Taser. Ég hef lagðist í rannsóknarleiðangur og skoðaði þetta tæki. Þegar lögreglumaðurinn sem skrifaði greinina talar um óháðar rannsóknir, þá á hann við rannsóknir sem gerðar eru án aðkomu framleiðandans. Þar má nefna ýmsa háskóla og stjórnvöld ýmissa landa. Það er skiljanlegt að þeir sem eru í stöðugum áflogum við lögregluna vilji ekki að svona tæki verði tekið upp hér. Og svo eru það þrýsihóparnir sem lifa á að halda sér í umræðunni til að fá fjárframlög og nýja félagsmenn. Þetta tæki er himnasending fyrir slíka hópa. En því miður hafa þessir hópar til þessa notað hina vinsælu smjörklípuaðferð á tækið og ekki síður hina gömlu "Let them deny it" taktík. En sú aðferð gengur út á að varpa fram fullyrðingum sem sá sem verður fyrir þarf svo að þvo af sér. Miðað við allar þær upplýsingar sem liggja fyrir varðandi þetta tiltekna tæki, þá hefur öllum vafa um öryggi þess, verið eytt hvað mig snertir. 

[Sigga Magg (IP-tala skráð) 15.5.2008 kl. 20:32]

Sæll og blessaður og takk fyrir síðast!

Ég er hjartanlega sammála þessum skrifum þínum um Taser, ég las nefnilega greinarkorn löggumannsins. Og þar sem ég er félagi í Amnesty International og eldri sonur minn formaður Íslandsdeildarinnar finnst mér við ekki eiga von á góðu. Ég er heldur ekki farin að sjá lögregluþjón í ham spyrja einhvern hvort hann sé með gangráð áður en hann fær stuð. Og ef viðkomandi svaraði játandi væri trúlegt að svarið yrði: "Þú lýgur því, helvískur."

Annars er ég búin að setja á þig link, en ég veit ekki hvernig þú átt að bera þig að..

[Sigga Magg (IP-tala skráð) 15.5.2008 kl. 20:42]

Sæll aftur.

Ég ætlaði auðvitað að segja að ég hefði sett á þig tengil - manneskja sem hefur atvinnu af íslensku máli ætti ekki að tala um link!