Svona tala ekki fjármálaráðherrar

"Árni M. Mathisen óttast að svör hans til umboðsmanns alþingis vegna ráðningar Þorsteins Davíðssonar í embætti Héraðsdómara hafi takmarkaða þýðingu, því umboðsmaður hafi mótað sér afstöðu í málinu fyrirfram."

Svona getur fjármálaráðherra landsins ekki leyft sér að tala, kjörinn alþingismaður á Alþingi Íslendinga og ráðherra. Svona tala aðeins hortugir götustrákar sem láta aldrei af skoðunum sínum og telja sig ætíð hafa rétt fyrir sér. En svona talar ekki maður sem vill láta taka mark á sér. Maður sem tekur ekki mark á því sem fagleg matsnefnd um ráðningu dómara, skipuð samkvæmt lögum til þess að gefa faglegt álit sitt, hefur ekkert á Alþingi að gera, hvað þá í ráðherrastól. Betra hefði verið og heiðarlega af ráðherranum að beita sér fyrir því að nefndin yrði lögð niður, rétt eins og ákveðinn fyrrverandi ráðherra, skyldur drengnum sem var gerður að dómara, gerði í öðru tilfelli og ráða hann svo.

Sem dýralæknir hefði hann kannski getað leyft sér að segja:  "...staða aðstoðarmanns ráðherra sé að lögum sambærileg við starf skrifstofustjóra í ráðuneyti. Einnig að þrátt fyrir að aldrei hafi reynt á störf Þorsteins sem varamanns í yfirkjörstjórn Reykjavíkurkjördæmis hafi Alþingi sýnt Þorsteini þann trúnað og traust að kjósa hann til starfans. Hann eigi auðvelt að greina aðalatriði frá aukaatriðum og hafi tekið virkan þátt í félagsstörfum í gegn um tíðina." En þetta segir ekki ráðherra í ríkisstjórn. Við gerum meiri kröfur til slíkra manna en svo.

Þetta er svo kjánalegt allt  saman að maður getur ekki orða bundist svona á síðkvöldi eftir skammt af Auden í meðförum Egils....

Athugasemdir

[Kristbergur O Pétursson, 27.3.2008 kl. 08:17]

Mér finnst að matsnefndin eigi að segja af sér til að mótmæla framkomu ráðherra. Ég veit ekkert um valdsvið umboðsmanns Alþingis eða vægi álitsgjafar hans. Ráðherra vænir hann afdráttarlaust um hlutdrægni í málinu og kannski á umboðsmaður það eina svar við því, að segja af sér í mótmælaskyni. Nema honum þyki vænna um vegtyllu sína en virðingu embættisins.